Pesë persona janë vrarë dhe 21 të tjerë janë plagosur në një sulm të armatosur në Teksas të Shteteve të Bashkuara të Amerikës.

Sulmuesi i armatosur, i cili filloi të qëllonte me armë pasi vetura e tij u ndalua nga policia të shtunën pasdite, u vra nga forcat e sigurisë pasi kishte hyrë në parkingun e një kompleksi të lokaleve zbavitëse.

Nuk janë dhënë hollësi për viktimat deri të dielën në mëngjes, por raportohet se në mesin e personave të vrarë është edhe një djalosh 17-muajsh, i cili ishte qëlluar në fytyrë dhe kishte vdekur më vonë në spital. Lajmin e bënë të ditur zyrtarët e spitalit në Odessa të Teksasit.

Ky është sulmi i dytë masiv në Teksas vetëm gjatë gushtit. Më 3 gusht, një sulmues i vrau 22 persona dhe i plagosi 24 të tjerë në El Paso.

Guvernatori i Teksasit, Greg Abbott, tha: “Zonja e parë dhe unë jemi zemërthyer pas këtij sulmi të pakuptimtë dhe frikacak dhe ua ofrojmë përkrahjen tonë viktimave, familjeve të tyre dhe tërë banorëve të Midland-it dhe Odessa-s”.

Autoritetet njoftuan se incidenti filloi rreth orës 3 e 17 minuta të pasdites së të shtunës sipas kohës lokale, kur një polic e ndaloi një veturë të tipit Honda me ngjyrë ari pasi nuk kishte dhënë shenjë për kthim majtas.

Personi i dyshuar filloi të qëllonte në veturën e policisë dhe më pas e kishte vjedhur një kamion të postës, duke e vazhduar sulmin me armë. Policia e përshkroi sulmuesin si burrë i bardhë në të tridhjetat, shkruan “The Guardian”, transmeton Gazeta Express.